Cantar I tiradas 59-61 vv. 1010-1032
Poema de Mio Cid, ed. Colin Smith, Madrid, Cátedra, 1990.
59
Hi gaño a Colada que mas vale de mil marcos de plata
i bençio esta batalla por o ondro su barba;
priso lo al conde, pora su tie[nd]a lo levava
a sos creenderos guardar lo mandava.
De fuera de la tienda un salto dava,
De todas partes los sos se ajunta[va]n;
plogo a mio Çid ca grandes son las ganançias.
A mio Çid don Rodrigo grant cozinal adobavan;
el conde don Remont non gelos preçia nada,
aduzen le los comeres, delant gelos paravan,
el non lo quiere comer, a todos los sosañava:
‘¡Non combre un bocado por quanto ha en toda España,
Antes perdere el cuerpo e dexare el alma
Pues que tales malcalçados me vencieron de batalla!’
60
Mio Çid Ruy Diaz odredes lo que dixo:
‘Comed, conde, deste pan e beved deste vino;
si lo que digo fizieredes saldredes de cativo,
si non, en todos vuestros dias non veredes christianismo.’
61
Dixo el conde don Remont: ‘Comede, don Rodrigo, e pensedes de folgar
Que yo dexar m’ e morir que no quiero comer.’
Fasta terçer dia nol pueden acordar;
Ellos partiendo estas ganançias grandes
Nol pueden fazer comer un muesso de pan.
